મોરબી જિલ્લા પંચાયતના પ્રમુખ ગીતાબેન દુબરિયાએ ટંકારા તાલુકાના નેસડા સુરજી ગામની મુલાકાત લઈને ગામના શૈક્ષણિક અને બાળ વિકાસ સંબંધિત કેન્દ્રોની કામગીરીનું નિરીક્ષણ કર્યું હતું. મુલાકાત દરમિયાન તેમણે ગામની પ્રાથમિક શાળા તેમજ આંગણવાડી કેન્દ્રની મુલાકાત લઈ ત્યાં ઉપલબ્ધ સુવિધાઓ, શિક્ષણની ગુણવત્તા અને બાળકોને મળતી સેવાઓ અંગે માહિતી મેળવી હતી.
પ્રાથમિક શાળાની મુલાકાત દરમિયાન પ્રમુખએ વર્ગખંડોની વ્યવસ્થા, વિદ્યાર્થીઓની હાજરી, શૈક્ષણિક પ્રવૃત્તિઓ તેમજ સરકારની વિવિધ શિક્ષણલક્ષી યોજનાઓના અમલીકરણ અંગે શિક્ષકો સાથે ચર્ચા કરી હતી. તેમણે વિદ્યાર્થીઓ સાથે સંવાદ સાધી તેમના અભ્યાસ અને શાળાની પ્રવૃત્તિઓ અંગે જાણકારી મેળવી હતી તથા બાળકોને નિયમિત અભ્યાસ અને ગુણવત્તાયુક્ત શિક્ષણ મેળવવા માટે પ્રોત્સાહિત કર્યા હતા.
ત્યારબાદ તેમણે ગામની આંગણવાડીની મુલાકાત લઈ નાના બાળકોના પોષણ, આરોગ્ય અને પ્રારંભિક શિક્ષણ માટે આપવામાં આવતી સેવાઓની સમીક્ષા કરી હતી. આંગણવાડીમાં બાળકોને આપવામાં આવતા પોષણયુક્ત આહાર, આરોગ્ય ચકાસણી તેમજ શૈક્ષણિક પ્રવૃત્તિઓ અંગે માહિતી મેળવી હતી.
ગીતાબેન દુબરિયાએ શિક્ષણ અને બાળ વિકાસ ક્ષેત્રે સરકાર દ્વારા ચલાવવામાં આવતી યોજનાઓનો લાભ વધુમાં વધુ બાળકો સુધી પહોંચે તે માટે સંબંધિત અધિકારીઓ અને કર્મચારીઓને જરૂરી માર્ગદર્શન આપ્યું હતું. તેમણે ગામના બાળકોના સર્વાંગી વિકાસ માટે શિક્ષકો, આંગણવાડી બહેનો અને વાલીઓને સંયુક્ત પ્રયાસો કરવા અનુરોધ કર્યો હતો.
આ મુલાકાત દરમિયાન સ્થાનિક આગેવાનો, ગ્રામ પંચાયતના પ્રતિનિધિઓ, શિક્ષણ વિભાગના અધિકારીઓ, શિક્ષકો, આંગણવાડી કાર્યકરો તેમજ ગામજનો ઉપસ્થિત રહ્યા હતા.
