માળિયા હરિપર ગામ પાસે આવેલ દેવ સોલ્ટ દ્વારા શિક્ષણના પ્રોત્સાહન અને ગ્રામ્ય વિસ્તારના વિદ્યાર્થીઓને શૈક્ષણિક સહાય પૂરી પાડવાની પોતાની સતત પ્રતિબદ્ધતા અંતર્ગત દેવ વેટલેન્ડ એન્ડ સોશિયલ વેલફેર ફાઉન્ડેશન (દેવ સોલ્ટ) દ્વારા વર્ષ-૨૦૨૬ના શાળા પ્રવેશોત્સવ નિમિત્તે દેવ સોલ્ટના કાર્યક્ષેત્ર આસપાસ આવેલા વિવિધ ગામોની શાળાઓમાં વિદ્યાર્થીઓને સ્કૂલ બેગ તથા જરૂરી શૈક્ષણિક સામગ્રીનું વિતરણ કરવામાં આવ્યું હતું. ઉપરાંત અન્ય વિદ્યાર્થીઓને નોટબુકો પણ આપવામાં આવી હતી.
આ કાર્યક્રમ દરમિયાન કંપનીના જનરલ મેનેજર ટોમી એન્ટોની, ડૉ. દિવ્યમ ધોકિયા, પાર્થ પંચાલ, રમજાન જેડા તથા તાજમામદ ઉપસ્થિત રહ્યા હતા. તેમણે વિવિધ શાળાઓની મુલાકાત લઈ વિદ્યાર્થીઓને વ્યક્તિગત રીતે શૈક્ષણિક સામગ્રીનું વિતરણ કર્યું હતું અને નવા શૈક્ષણિક વર્ષની શુભેચ્છાઓ પાઠવી હતી.
ફાઉન્ડેશન દ્વારા માત્ર સ્કૂલ બેગ અને શૈક્ષણિક સામગ્રી જ નહીં, પરંતુ ગયા વર્ષે પ્રથમ વખત કાર્યક્રમમાં સમાવિષ્ટ કરાયેલી કેટલીક શાળાઓના વિદ્યાર્થીઓને ટી-શર્ટનું પણ વિતરણ કરવામાં આવ્યું હતું. વિદ્યાર્થીઓએ આ સહાયને આનંદ અને ઉત્સાહ સાથે સ્વીકારી હતી.
દેવ સોલ્ટ ફાઉન્ડેશન દ્વારા કરવામાં આવતી આવી સામાજિક પહેલો ગ્રામ્ય વિસ્તારના વિદ્યાર્થીઓમાં શિક્ષણ પ્રત્યેનો ઉત્સાહ વધારવા તેમજ તેમને જરૂરી શૈક્ષણિક સાધનો ઉપલબ્ધ કરાવવામાં મહત્વપૂર્ણ સાબિત થઈ રહી છે. ફાઉન્ડેશન ભવિષ્યમાં પણ શિક્ષણ અને સામાજિક કલ્યાણના ક્ષેત્રે આવી સેવાકીય પ્રવૃત્તિઓ ચાલુ રાખશે તેમ જણાવ્યું હતું.
