મોરબી જિલ્લાના નાગરિકો અને રાજકોટ–મોરબી માર્ગ પરથી અવરજવર કરતા વાહનચાલકો માટે આનંદના સમાચાર રાજકોટ–મોરબી સ્ટેટ હાઇવે (એસ.એચ.-૨૪)ના રિસરફેસિંગ અને માર્ગને વધુ સુવિધાજનક બનાવવા માટે ગુજરાત સરકાર દ્વારા અંદાજિત રૂ. ૧૦૩ કરોડના વિકાસકાર્યોને મંજૂરી આપવામાં આવી છે.
આ વિકાસકાર્ય અંતર્ગત રાજકોટ–મોરબી રોડના કુલ ૬૪.૩૧૮ કિલોમીટરના માર્ગ પર રિસરફેસિંગની કામગીરી હાથ ધરવામાં આવશે.
આ યોજના અંતર્ગત બે તબક્કામાં કામગીરી કરવામાં આવશે.
પ્રથમ તબક્કો: ૪૪.૧૬૩ કિલોમીટરના માર્ગ માટે રૂ. ૭૪ કરોડની મંજૂરી.
બીજો તબક્કો: ૧૮.૧૫૫ કિલોમીટરના માર્ગ માટે રૂ. ૨૯ કરોડની મંજૂરી.
આ કામગીરીમાં સમગ્ર લંબાઈમાં ૫૦ એમ.એમ. જાડાઈનું બી.સી. લેયર, પસંદગીની લંબાઈમાં સી.સી. રોડ, ઓ.ડી.આર. તેમજ સર્વિસ રોડ અને ફર્નિચર જેવી આનુષંગિક કામગીરીનો સમાવેશ કરવામાં આવ્યો છે.
આ મહત્વપૂર્ણ વિકાસકાર્યને મંજૂરી આપવા બદલ ગુજરાત રાજ્યના મુખ્યમંત્રી ભૂપેન્દ્રભાઈ પટેલ તથા નાયબ મુખ્યમંત્રી હર્ષભાઈ સંઘવી નો ૬૬-ટંકારા પડધરી વિધાનસભાના ધારાસભ્ય દુર્લભજીભાઈ દેથરિયા એ હૃદયપૂર્વક આભાર વ્યક્ત કર્યો છે.
રાજ્યની સંવેદનશીલ અને વિકાસલક્ષી સરકાર દ્વારા સતત લોકહિતના કાર્યોને પ્રાધાન્ય આપવામાં આવી રહ્યું છે. આ માર્ગનું રિસરફેસિંગ પૂર્ણ થતાં રાજકોટ અને મોરબી વચ્ચેની મુસાફરી વધુ સુગમ, સલામત અને આરામદાયક બનશે તેમજ સ્થાનિક નાગરિકો, વેપારીઓ અને વાહનચાલકોને મોટી રાહત મળશે.
આ વિકાસલક્ષી નિર્ણય બદલ મોરબી વિસ્તારના નાગરિકોમાં આનંદની લાગણી પ્રસરી છે.







